Konsert med Eldbjørg Hemsing og Trondheimsolistene

Kvelden byr på eit spennande møte mellom ny musikk, rytmar frå ulike delar av verda og ein moderne klassikar.

Konserten opnar med eit heilt nytt verk av Ellen Lindquist. Deretter følgjer Quenton Blache sitt eksotiske og energiske stykke Habari Gani, før kvelden blir avslutta med Max Richters Recomposed: Vivaldi – The Four Seasons. I Richters nyskaping møter Antonio Vivaldis ikoniske De fire årstidene eit moderne, minimalistisk tonespråk. Resultatet er eit verk som både peikar tilbake på barokkmusikken og lyttar til vår eiga tid – eit verk som med tida har blitt eit av dei mest spelte stykka av nolevande komponistar.

Med Eldbjørg Hemsing som solist og TrondheimSolistene på scena blir dette ein konsert der tradisjon og fornying møtest – frå det heilt nye til eit av dei mest kjende verka i den klassiske musikkhistoria.